Wednesday, July 25, 2018

دُبئی:پولیس اہلکار کی ٹھُکائی کرنے والا بھارتی شہری جیل پہنچ گیا

Tags

ایک پولیس اہلکار کو مارنے پیٹنے اوراُس کی سرکاری گاڑی کو نقصان پہنچانے کے الزام میں 53 سالہ بھارتی شہری کو چھ ماہ کی سزا سُنا دی گئی۔ تفصیلات کے مطابق الکرما کے علاقے میں معمول کی ڈیوٹی پر تعینات پولیس سارجنٹ نے ایک بھارتی ڈرائیور کو خستہ حال کار چلاتے دیکھا تو اُسے گاڑی روکنے کا اشارہ کیا۔ گاڑی کے رُکنے پر مذکورہ بھارتی شہری کے کاغذات چیک کیے گئے تو پتا چلا کہ یہ شخص پولیس کو کئی معاملات میں مطلوب ہے۔ پولیس والے نے اُسے گرفتار کرنا چاہا تو اُس نے بہانہ کیا کہ وہ پہلے پارکنگ میٹر پر جا کر اپنی گاڑی کا پارکنگ ٹکٹ وصول کر لے پھر واپس آ کر گرفتاری دے دے گا۔ لیکن وہ پارکنگ ٹکٹ لینے کی بجائے وہاں سے بھاگ کھڑا ہوا۔ سارجنٹ نے ملزم کا پیچھا کر کے اُسے پکڑ لیا تو اُس نے پہلے تو سارجنٹ کو مارا پیٹا اور پھر دھکا دے کر زمین پر گِرا دیا۔ جس پر سارجنٹ کا ایک ہاتھ زخمی ہو گیا تاہم وہ ہمت سے کام لیتے ہوئے اُٹھ کھڑا ہوا اور ملزم کو ہتھکڑی لگا کر گرفتار کر لیا۔ جب وہ ملزم کو پولیس کار میں بٹھانے لگا تو اُس نے دوبارہ مزاحمت کا مظاہرہ کیا اور پھر سے بھاگنے کی کوشش کی جس دوران گاڑی کا دروازہ پچک گیا۔ عدالت نے ملزم کو پولیس اہلکار کی مار پیٹ کرنے اور گاڑی کے دروازے کو ٹکر مار کر 1,316اماراتی درہم کا نقصان پہنچانے کا مجرم قرار دے دیا۔ مجرم کو چھ ماہ قید کے علاوہ 1,316 درہم کا جرمانہ بھی ادا کرنا ہو گا۔ جبکہ سزا کی مُدت پُوری ہوتے ہی اُسے ڈی پورٹ کر دیا جائے گا۔ ملزم نے عدالت میں اپنی بے گناہی ظاہر کرتے ہوئے کہا کہ اُس نے سارجنٹ کو دھکا نہیں دیا بلکہ وہ اُس کا تعاقب کرنے کے دوان خود ہی گِر گیا تھا جس کے باعث اُسے ہاتھ پر چوٹ آئی۔ جبکہ کار میں بٹھاتے وقت سارجنٹ نے اُسے دروازے کی طرف دھکا دیا جس کے باعث دروازے کو ضرب لگی۔ ملزم کو فیصلے کے خلاف پندرہ دِن کے اندر اپیل کا حق دیا گیا ہے


EmoticonEmoticon